Leningrad Codex TEI · v1.2.0 · folio 337B (verso) · 1 Chr 16:35 – 1 Chr 17:14
Column 1
וְהַצִּילֵ֖נוּ מִן־הַגּוֹיִ֑ם
לְהֹדוֹת֙ לְשֵׁ֣ם קָדְשֶׁ֔ךָ
לְהִשְׁתַּבֵּ֖חַ בִּתְהִלָּתֶֽךָ׃
בָּר֤וּךְ יְהוָה֙ אֱלֹהֵ֣י יִשְׂרָאֵ֔ל
מִן־הָעוֹלָ֖ם וְעַ֣ד הָעֹלָ֑ם
וַיֹּאמְר֤וּ כָל־הָעָם֙ אָמֵ֔ן וְהַלֵּ֖ל
לַֽיהוָֽה׃פ
וַיַּֽעֲזָב־שָׁ֗ם לִפְנֵי֙ אֲר֣וֹן בְּרִית־
יְהוָ֔ה לְאָסָ֖ף וּלְאֶחָ֑יו לְשָׁרֵ֞ת
לִפְנֵ֧י הָאָר֛וֹן תָּמִ֖יד לִדְבַר־י֥וֹם
בְּיוֹמֽוֹ׃ וְעֹבֵ֥ד אֱדֹ֛ם וַאֲחֵיהֶ֖ם
שִׁשִּׁ֣ים וּשְׁמוֹנָ֑ה וְעֹבֵ֨ד אֱדֹ֧ם
בֶּן־יְדִית֛וּן וְחֹסָ֖ה לְשֹׁעֲרִֽים׃
וְאֵ֣ת ׀ צָד֣וֹק הַכֹּהֵ֗ן וְאֶחָיו֙
הַכֹּ֣הֲנִ֔ים לִפְנֵ֖י מִשְׁכַּ֣ן יְהוָ֑ה
בַּבָּמָ֖ה אֲשֶׁ֥ר בְּגִבְעֽוֹן׃ לֽ͏ְהַעֲלוֹת֩
עֹל֨וֹת לַיהוָ֜ה עַל־מִזְבַּ֧ח הָעֹלָ֛ה
תָּמִ֖יד לַבֹּ֣קֶר וְלָעָ֑רֶב וּלְכָל־
הַכָּתוּב֙ בְּתוֹרַ֣ת יְהוָ֔ה אֲשֶׁ֥ר
צִוָּ֖ה עַל־יִשְׂרָאֵֽל׃ וְעִמָּהֶם֙
הֵימָ֣ן וִֽידוּת֔וּן וּשְׁאָר֙ הַבְּרוּרִ֔ים
אֲשֶׁ֥ר נִקְּב֖וּ בְּשֵׁמ֑וֹת לְהֹדוֹת֙
לַֽיהוָ֔ה כִּ֥י לְעוֹלָ֖ם חַסְדּֽוֹ׃
וְעִמָּהֶם֩ הֵימָ֨ן וִֽידוּת֜וּן חֲצֹצְר֤וֹת
וּמְצִלְתַּ֙יִם֙ לְמַשְׁמִיעִ֔ים וּכְלֵ֖י
שִׁ֣יר הָאֱלֹהִ֑ים וּבְנֵ֥י יְדוּת֖וּן
לַשָּֽׁעַר׃ וַיֵּלְכ֥וּ כָל־הָעָ֖ם אִ֣ישׁ
Column 2
לְבֵית֑וֹ וַיִּסֹּ֥ב דָּוִ֖יד לְבָרֵ֥ךְ אֶת־
בֵּיתֽוֹ׃פ
וַיְהִ֕י כַּאֲשֶׁ֛ר יָשַׁ֥ב דָּוִ֖יד בְּבֵית֑וֹ
וַיֹּ֨אמֶר דָּוִ֜יד אֶל־נָתָ֣ן הַנָּבִ֗יא
הִנֵּ֨ה אָנֹכִ֤י יוֹשֵׁב֙ בְּבֵ֣ית
הֽ͏ָאֲרָזִ֔ים וַאֲר֥וֹן בְּרִית־יְהוָ֖ה
תַּ֥חַת יְרִיעֽוֹת׃ וַיֹּ֤אמֶר נָתָן֙
אֶל־דָּוִ֔יד כֹּ֛ל אֲשֶׁ֥ר בִּֽלְבָבְךָ֖
עֲשֵׂ֑ה כִּ֥י הָאֱלֹהִ֖ים עִמָּֽךְ׃ס
וַֽיְהִ֖י בַּלַּ֣יְלָה הַה֑וּא
וַיְהִי֙ דְּבַר־אֱלֹהִ֔ים אֶל־נָתָ֖ן
לֵאמֹֽר׃ לֵ֤ךְ וְאָמַרְתָּ֙ אֶל־
דָּוִ֣יד עַבְדִּ֔י כֹּ֖ה אָמַ֣ר יְהוָ֑ה
לֹ֥א אַתָּ֛ה תִּבְנֶה־לִּ֥י הַבַּ֖יִת
לָשָֽׁבֶת׃ כִּ֣י לֹ֤א יָשַׁ֙בְתִּי֙
בְּבַ֔יִת מִן־הַיּ֗וֹם אֲשֶׁ֤ר הֶעֱלֵ֙יתִי֙
אֶת־יִשְׂרָאֵ֔ל עַ֖ד הַיּ֣וֹם הַזֶּ֑ה
וָֽאֶהְיֶ֛ה מֵאֹ֥הֶל אֶל־אֹ֖הֶל
וּמִמִּשְׁכָּֽן׃ בְּכֹ֥ל אֲשֶֽׁר־
הִתְהַלַּכְתִּי֮ בְּכָל־יִשְׂרָאֵל֒
הֲדָבָ֣ר דִּבַּ֗רְתִּי אֶת־אַחַד֙
שֹׁפְטֵ֣י יִשְׂרָאֵ֔ל אֲשֶׁ֥ר צִוִּ֛יתִי
לִרְע֥וֹת אֶת־עַמִּ֖י לֵאמֹ֑ר
לָ֛מָּה לֹא־בְנִיתֶ֥ם לִ֖י בֵּ֥ית
אֲרָזִֽים׃ וְ֠עַתָּה כֹּֽה־תֹאמַ֞ר
לְעַבְדִּ֣י לְדָוִ֗ידס
כֹּ֤ה אָמַר֙ יְהוָ֣ה צְבָא֔וֹת
Column 3
אֲנִ֤י לְקַחְתִּ֙יךָ֙ מִן־הַנָּוֶ֔ה
מִֽן־אַחֲרֵ֖י הַצֹּ֑אן לִהְי֣וֹת נָגִ֔יד
עַ֖ל עַמִּ֥י יִשְׂרָאֵֽל׃ וָֽאֶהְיֶ֣ה
עִמְּךָ֗ בְּכֹל֙ אֲשֶׁ֣ר הָלַ֔כְתָּ
וָאַכְרִ֥ית אֶת־כָּל־אוֹיְבֶ֖יךָ
מִפָּנֶ֑יךָ וְעָשִׂ֤יתִֽי לְךָ֙ שֵׁ֔ם כְּשֵׁ֥ם
הַגְּדוֹלִ֖ים אֲשֶׁ֥ר בָּאָֽרֶץ׃
וְשַׂמְתִּ֣י מָ֠קוֹם לְעַמִּ֨י יִשְׂרָאֵ֤ל
וּנְטַעְתִּ֙יהוּ֙ וְשָׁכַ֣ן תַּחְתָּ֔יו
וְלֹ֥א יִרְגַּ֖ז ע֑וֹד וְלֹא־יוֹסִ֤יפוּ
בְנֵי־עַוְלָה֙ לְבַלֹּת֔וֹ כַּאֲשֶׁ֖ר
בָּרִאשׁוֹנָֽה׃ וּלְמִיָּמִ֗ים אֲשֶׁ֨ר
צִוִּ֤יתִי שֹֽׁפְטִים֙ עַל־עַמִּ֣י
יִשְׂרָאֵ֔ל וְהִכְנַ֖עְתִּי אֶת־כָּל־
אוֹיְבֶ֑יךָ וָאַגִּ֣ד לָ֔ךְ וּבַ֖יִת יִֽבְנֶה־
לְּךָ֥ יְהוָֽה׃ וְהָיָ֗ה כִּֽי־מָלְא֤וּ יָמֶ֙יךָ֙
לָלֶ֣כֶת עִם־אֲבֹתֶ֔יךָ וַהֲקִֽימוֹתִ֤י
אֶֽת־זַרְעֲךָ֙ אַחֲרֶ֔יךָ אֲשֶׁ֥ר
יִהְיֶ֖ה מִבָּנֶ֑יךָ וַהֲכִינוֹתִ֖י אֶת־
מַלְכוּתֽוֹ׃ ה֥וּא יִבְנֶה־לִּ֖י בָּ֑יִת
וְכֹנַנְתִּ֥י אֶת־כִּסְא֖וֹ עַד־עוֹלָֽם׃
אֲנִי֙ אֶֽהְיֶה־לּ֣וֹ לְאָ֔ב וְה֖וּא
יִֽהְיֶה־לִּ֣י לְבֵ֑ן וְחַסְדִּי֙ לֹא־אָסִ֣יר
מֵֽעִמּ֔וֹ כַּאֲשֶׁ֣ר הֲסִיר֔וֹתִי
מֵאֲשֶׁ֥ר הָיָ֖ה לְפָנֶֽיךָ׃ וְהַֽעֲמַדְתִּ֛יהוּ
בְּבֵיתִ֥י וּבְמַלְכוּתִ֖י עַד־הָעוֹלָ֑ם
וְכִסְא֕וֹ יִהְיֶ֥ה נָכ֖וֹן עַד־עוֹלָֽם׃
How this page was made
The text comes from UXLC. It was not transcribed from this image, so the two can differ on purpose. An AI model aligned the text to columns and lines, and a handwriting model located each verse on the image.
- Christopher V. KimballBase biblical text from the Unicode/XML Leningrad Codex (UXLC) (version UXLC 2.5, build 27.6, 1 Apr 2026) tanach.us
- Ben DencklaFolio mapping derived from the index of the Leningrad Codex github.com
- Idan DershowitzVerse zones from the Masoretica handwritten text recognition (HTR) of the Leningrad Codex masoretica.org
- West Semitic ResearchPhotographs courtesy of Bruce Zuckerman, West Semitic Research, with the collaboration of the Ancient Biblical Manuscript Center.
- sarahmccuanTEI encoding and alignment
- Charles W. LoderTEI encoding
- claude-opus-5-5AI model used to align the text to the columns and lines
0 lines picked. Click lines on the page to attach them.