Leningrad Codex TEI · v1.2.0 · folio 442A (recto) · Dan 5:5 – Dan 5:20
Column 1
וּמַלְכָּ֣א חָזֵ֔ה פַּ֥ס יְדָ֖ה דִּ֥י
כָתְבָֽה׃ אֱדַ֤יִן מַלְכָּא֙ זִיוֺ֣הִי
שְׁנ֔וֹהִי וְרַעיֹנֹ֖הִי יְבַהֲלוּנֵּ֑הּ
וְקִטְרֵ֤י חַרְצֵהּ֙ מִשְׁתָּרַ֔יִן
וְאַ֨רְכֻבָּתֵ֔הּ דָּ֥א לְדָ֖א נָֽקְשָֽׁן׃
קָרֵ֤א מַלְכָּא֙ בְּחַ֔יִל לְהֶֽעָלָה֙
לְאָ֣שְׁפַיָּ֔א כשדיא וְגָזְרַיָּ֑א
עָנֵ֨ה מַלְכָּ֜א וְאָמַ֣ר ׀ לְחַכִּימֵ֣י
בָבֶ֗ל דִּ֣י כָל־אֱ֠נָשׁ דִּֽי־יִקְרֵ֞ה
כְּתָבָ֣ה דְנָ֗ה וּפִשְׁרֵהּ֙ יְחַוִנַּ֔נִי
אַרְגְּוָנָ֣א יִלְבַּ֗שׁ והמונכא
דִֽי־דַהֲבָא֙ עַֽל־צַוְּארֵ֔הּ
וְתַלְתִּ֥י בְמַלְכוּתָ֖א יִשְׁלַֽט׃ס
אֱדַ֙יִן֙ עללין כֹּ֖ל
חַכִּימֵ֣י מַלְכָּ֑א וְלָֽא־כָהֲלִ֤ין
כְּתָבָא֙ לְמִקְרֵ֔א ופשרא
לְהוֹדָעָ֥ה לְמַלְכָּֽא׃ אֱ֠דַיִן
מַלְכָּ֤א בֵלְשַׁאצַּר֙ שַׂגִּ֣יא
מִתְבָּהַ֔ל וְזִיוֺ֖הִי שָׁנַ֣יִן עֲל֑וֹהִי
וְרַבְרְבָנ֖וֹהִי מִֽשְׁתַּבְּשִֽׁין׃
מַלְכְּתָ֕א לָקֳבֵ֨ל מִלֵּ֤י מַלְכָּא֙
וְרַבְרְבָנ֔וֹהִי לְבֵ֥ית מִשְׁתְּיָ֖א
עללת עֲנָ֨ת מַלְכְּתָ֜א
וַאֲמֶ֗רֶת מַלְכָּא֙ לְעָלְמִ֣ין
חֱיִ֔י אַֽל־יְבַהֲלוּךְ֙ רַעְיוֹנָ֔ךְ
וזיויך אַל־יִשְׁתַּנּֽוֹ׃ אִיתַ֨י גְּבַ֜ר
בְּמַלְכוּתָ֗ךְ דִּ֠י ר֣וּחַ אֱלָהִ֣ין
Column 2
קַדִּישִׁין֮ בֵּהּ֒ וּבְיוֹמֵ֣י אֲב֗וּךְ
נַהִיר֧וּ וְשָׂכְלְתָנ֛וּ וְחָכְמָ֥ה
כְּחָכְמַת־אֱלָהִ֖ין הִשְׁתְּכַ֣חַת
בֵּ֑הּ וּמַלְכָּ֤א נְבֻֽכַדְנֶצַּר֙
אֲב֔וּךְ רַ֧ב חַרְטֻמִּ֣ין אָֽשְׁפִ֗ין
כַּשְׂדָּאִין֙ גָּזְרִ֔ין הֲקִימֵ֖הּ
אֲב֥וּךְ מַלְכָּֽא׃ כָּל־קֳבֵ֡ל דִּ֣י
ר֣וּחַ ׀ יַתִּירָ֡ה וּמַנְדַּ֡ע וְשָׂכְלְתָנ֡וּ
מְפַשַּׁ֣ר חֶלְמִין֩ וַֽאַֽחֲוָיַ֨ת
אֲחִידָ֜ן וּמְשָׁרֵ֣א קִטְרִ֗ין
הִשְׁתְּכַ֤חַת בֵּהּ֙ בְּדָ֣נִיֵּ֔אל דִּֽי־
מַלְכָּ֥א שָׂם־שְׁמֵ֖הּ בֵּלְטְשַׁאצַּ֑ר
כְּעַ֛ן דָּנִיֵּ֥אל יִתְקְרֵ֖י וּפִשְׁרָ֥ה
יְהַֽחֲוֵֽה׃פ
בֵּאדַ֙יִן֙ דָּֽנִיֵּ֔אל הֻעַ֖ל קֳדָ֣ם
מַלְכָּ֑א עָנֵ֨ה מַלְכָּ֜א וְאָמַ֣ר
לְדָנִיֵּ֗אל אנתה־ה֤וּא דָנִיֵּאל֙
דִּֽי־מִן־בְּנֵ֤י גָלוּתָא֙ דִּ֣י יְה֔וּד
דִּ֥י הַיְתִ֛י מַלְכָּ֥א אַ֖בִי מִן־
יְהֽוּד׃ וְשִׁמְעֵ֣ת עליך דִּ֛י
ר֥וּחַ אֱלָהִ֖ין בָּ֑ךְ וְנַהִיר֧וּ
וְשָׂכְלְתָנ֛וּ וְחָכְמָ֥ה יַתִּירָ֖ה
הִשְׁתְּכַ֥חַת בָּֽךְ׃ וּכְעַ֞ן
הֻעַ֣לּוּ קָֽדָמַ֗י חַכִּֽימַיָּא֙
אָֽשְׁפַיָּ֔א דִּֽי־כְתָבָ֤ה דְנָה֙
יִקְר֔וֹן וּפִשְׁרֵ֖הּ לְהוֹדָעֻתַ֑נִי
וְלָֽא־כָהֲלִ֥ין פְּשַֽׁר־מִלְּתָ֖א
Column 3
לְהַחֲוָיָֽה׃ וַאֲנָה֙ שִׁמְעֵ֣ת
עליך דִּֽי־תוכל פִּשְׁרִ֛ין
לְמִפְשַׁ֖ר וְקִטְרִ֣ין לְמִשְׁרֵ֑א
כְּעַ֡ן הֵן֩ תוכל כְּתָבָ֜א
לְמִקְרֵ֗א וּפִשְׁרֵהּ֙ לְהוֹדָ֣עֻתַ֔נִי
אַרְגְּוָנָ֣א תִלְבַּ֗שׁ והמונכא
דִֽי־דַהֲבָא֙ עַֽל־צַוְּארָ֔ךְ
וְתַלְתָּ֥א בְמַלְכוּתָ֖א תִּשְׁלַֽט׃
פ
בֵּאדַ֜יִן עָנֵ֣ה דָנִיֵּ֗אל וְאָמַר֙
קֳדָ֣ם מַלְכָּ֔א מַתְּנָתָךְ֙ לָ֣ךְ
לֶֽהֶוְיָ֔ן וּנְבָ֥זְבְּיָתָ֖ךְ לְאָחֳרָ֣ן
הַ֑ב בְּרַ֗ם כְּתָבָא֙ אֶקְרֵ֣א
לְמַלְכָּ֔א וּפִשְׁרָ֖א אֲהוֹדְעִנֵּֽהּ׃
אנתה מַלְכָּ֑א אֱלָהָא֙ עליא
מַלְכוּתָ֤א וּרְבוּתָא֙ וִיקָרָ֣א
וְהַדְרָ֔ה יְהַ֖ב לִנְבֻכַדְנֶצַּ֥ר
אֲבֽוּךְ׃ וּמִן־רְבוּתָא֙ דִּ֣י יְהַב־
לֵ֔הּ כֹּ֣ל עַֽמְמַיָּ֗א אֻמַיָּא֙
וְלִשָּׁ֣נַיָּ֔א הֲו֛וֹ זאעין וְדָחֲלִ֖ין
מִן־קֳדָמ֑וֹהִי דִּֽי־הֲוָ֨ה צָבֵ֜א
הֲוָ֣א קָטֵ֗ל וְדִֽי־הֲוָ֤ה צָבֵא֙
הֲוָ֣ה מַחֵ֔א וְדִֽי־הֲוָ֤ה צָבֵא֙
הֲוָ֣ה מָרִ֔ים וְדִֽי־הֲוָ֥ה צָבֵ֖א
הֲוָ֥ה מַשְׁפִּֽיל׃ וּכְדִי֙ רִ֣ם
לִבְבֵ֔הּ וְרוּחֵ֖הּ תִּֽקְפַ֣ת
לַהֲזָדָ֑ה הָנְחַת֙ מִן־כָּרְסֵ֣א
How this page was made
The text comes from UXLC. It was not transcribed from this image, so the two can differ on purpose. An AI model aligned the text to columns and lines, and a handwriting model located each verse on the image.
- Christopher V. KimballBase biblical text from the Unicode/XML Leningrad Codex (UXLC) (version UXLC 2.5, build 27.6, 1 Apr 2026) tanach.us
- Ben DencklaFolio mapping derived from the index of the Leningrad Codex github.com
- Idan DershowitzVerse zones from the Masoretica handwritten text recognition (HTR) of the Leningrad Codex masoretica.org
- West Semitic ResearchPhotographs courtesy of Bruce Zuckerman, West Semitic Research, with the collaboration of the Ancient Biblical Manuscript Center.
- sarahmccuanTEI encoding and alignment
- Charles W. LoderTEI revision
- claude-opus-5-5AI model used to align the text to the columns and lines
0 lines picked. Click lines on the page to attach them.